Arunachal : Ruahsur nasa avangin West leh East Kameng-ah Red alert puang

Arunachal Pradesh khawpui Itanagar-a Meteorological Centre chuan June 27 aṭanga July 1 thleng state hmun hrang hrangah ruah leh thlipui na tak a thawk dawn nia tarlangin, district hrang hrangah ni nga chhung atan khawchin laka fimkhurna (weather warning) a tichhuak.

Thuchhuah an siamah hian nimin June 28 pawh khan ruah nasa takin a sur chhunzawm thu leh, West Kameng leh East Kameng district-ah Red alert puan a nih thu an tarlang. District dang - Pakke Kessang, Papum Pare, Lower Subansiri leh West Siang-ahte Orange alert puan a ni a, ruah nasa taka a sur theih thu leh mipuite chu ruahsur vanga chhiatna thleng thei laka inveng leh inralring tura hriattir an ni. Vawiin June 29 atan hian West Kameng, Papum Pare, East Siang leh Lower Dibang valey-ah Orange alert puan chhunzawm a ni.

Meteorological thuneitute chuan naktuk, June 30 aṭang hian ruahsur hian ziaawm lam a pan an rin thu tarlangin, district tam zawkah ruahsur nasa in a nghawng chhiatna thleng thei laka fimkhur thuah Yellow alert an puan chhunzawm bawk a ni. July 1 aṭang hian state-a hmun tam zawkah ruah a sur chhunzawm rin a ni bawk. Meteorological Centre chuan mipuite chu fimkhur turin an chah a, official-ten khawchin an update-te thlithlai reng turin an ngen.