Nagaland : NSF panel-in ILR langtlang taka kalpui tiam

Naga Students' Federation (NSF)-a Inner Line regulation Commission (ILRC) chuan Nagaland-a Inner Line Regulation (ILR) chu langtlang taka kalpui a nih theihna atan leh, state leilung fate dikna chanvo humhalhna turin hma lak a ni dawn tih an sawi.

Commission chuan state-a ILR kalpui dan thuam chakna tura Dimapur-a Bhojpuri Samaj leh Bihari Samaj aiawhte nen consultative meeting an neih zawhah he thuchhuah hi an siam a ni. ILRC chuan meeting hi harsatna leh rawtna awm sawi hona hun a nih thu leh, meeting-a sawi hona an neihte chu commission-in a zirchiang dawn tih sawiin, ILR chu langtlang leh ṭangkai zawka kalpui theihna tura rawtna siamte a pui dawn tih an tarlang.

Hei bakah commission chuan meeting chu langtlang, mitin huap leh intluktlanna nen kalpui a nih thu leh, a kaihhnawih stakeholder zawng zawngte chu an ngaihdan an sawi theihna tura sawm tel vek an ni tih an sawi. IRLC chuan Naga-te chu Nagaland-a leilung fa awmchhun an nih thu sawiin, ILR kalpuiin a tum ber chu leilung fate chanchin, politics, mihring awm zat, economy leh cultural right bakah inrelbawlna hrang hranga hmalakna awmsa humhalhna tur a nih thu an sawi bawk.