Arunachal : Ruahsur nasa in chhiatna thlen

Arunachal Pradesh-a ruahsur nasa leh tuilian chuan Lower Siang leh East Siang district hmun ṭhenkhatah chhiatna nasa tak a thlen a, lo neihna hmun, chenna in, vantlang infrastructure leh kawng inkalpawhna a tichhia. Lower Siang district-ah ruah a sur chhunzawm zel avangin Mane khuaa buh chinna hmun chu tuiin a chim pil tawh a, thlai chin dangte a tihchhiat nasat avangin loneituten harsatna nasa tak an tawk mek.

Tuilian hian Assam-Arunachal Pradesh ramri bial pawh nasa takin a nghawng a, Ruksin-a highway-ah tui tling a tam bakah, leimin nasa tak a thlen a, hei hian inkalpawhna lamah harsatna a thlen bawk a ni. East Siang district-ah pawh ruahsur nasa leh tuilian chuan hmun tam takah chhiatna a thlen a, Jawaharlal Nehru College-a Upper Campus panna kawng a chhiat nasat avangin institution tlawh pawh theih lohin a awm bawk.

Sile leh Sibo Korong-a tuilian chuan Pasighat leh a chhehvelah chenna in leh sumdawnna hmunah chhiatna nasa tak a thlen bawk. Besong Korong lui a len avangin Taki Lalung leh Bogong-I ah chhiatna nasa tak a thlen bawk a ni. Runne Church leh Letong Korong chunga lei dawh pawh a chhia a, Ledum khuaa Dengkham lui a len avangin chenna in tam tak a chhiat bakah chhungkaw eng emaw zatin harsatna an tawk mek bawk a ni. Leku leh Rani khuaa National Highway chu tuilianin a chim avangin veivahna leh bungraw phurh kawngah harsatna a thlen bawk a ni.