Assam : DMCH-in NABH accreditation hmu

Assam-a Dhubri Medical College and Hospital (DMCH) chu National Accreditation Board for Hospitals and Healthcare Providers (NABH)-in accreditation a pe a, hei hi Lower Assam-a public healthcare infrastructure-a hmasawnna lian tak a ni. Accreditation pek hmang hian sorkar enkawl medical institution hi damlo enkawl, safety protocol leh damdawi-in inrelbawlna tura ram pum huapa standard siam zawmtu healthcare facility zingah hlankai a ni.

He thu hi state cabinet minister leh, Dhubri district guardian minister ni bawk Ashok Singhal chuan a social media kaltlangin a puang. NABH accreditation hi ramchhung healthcare sector-a quality benchmark pawimawh tak niin; damlote himna, clinical practice, infection control, damdawi lam enkawl dan, operational process leh quality assurance mechanism-te damdawi-in hrang hranga endikna neih a nih hnuah pek an ni ṭhin.

Institution-a official-te chuan accreditation chu healthcare tihchak leh, damdawi-in kalphung tihchangtlunna tura hmalakna ngelnghet an neih vanga hmu an nih thu an sawi. DMCH principal Dr. Ankumani Saikia chuan accreditation pek an ni chu damlo enkawl kawnga healthcare service an thuam chak vang leh, hnathawkte inpekna leh inrelbawlnaa theihtawp an chhuah vang a nih thu a sawi bawk. Hospital superintendent Gunajit Das pawhin accreditation pek an nih chungchang sawilangin, institutional process a tihchak bakah medical college leh hospital-a service pek chhuahte chu mipuiin an rin ngamna a tihpun a beisei thu a sawi.