Nagaland : Music education tihhmasawn nan TaFMA leh RWCMD thawk dun

Nagaland sorkar hnuaia Task Force for Music & Arts (TaFMA) leh Royal Welsh College of Music & Drama (RWCMD) chuan Nagaland state chhunga music zirna leh thiamna tihhmasawn leh, cultural exchange tana thawk dun turin inremna an siam.

An thawh dunna tur hi RWCMD-a Dean of Students, Brian Weir-a'n June thla laihawla Nagaland a tlawh ṭum khan an siam a ni. Weir hian music leh thiamna hrang hrangte hmasawnna tura thawk dun zelna tur hrang hrang a enfiah a ni. Nagaland music khawvela mi pawimawh hrang hrangte a kawm a, hmun pawimawh hrang hrang—TaFMA headquarters, Music Academy Kohima, Nagaland College of Music and Fine Arts, Margaret Shishak School of Music leh Tetso College-te a tlawh bawk. Heng hunah hian music zirna in hrang hrang, artist-te, zirtirtute leh he hna khawih tute nena thawh hona ṭha zawk neih dan tur an sawi ho a ni.

TaFMA chuan an thawh dunna hi Nagaland music tana hmasawnna lungphum pawimawh tak a ni tiin, he hmalakna hian thiamna thar zawn leh khawvel huapa inzawmna thar siam kawngah Nagaland artist-te tan kawng thar a hawn ngei an beisei tih an tarlang.