Manipur : High Court thupek khinna SC-in hnawl

Supreme Court chuan Ningani khan Manipur High Court-in an state-a panchayat inthlan buatsaih hun tur pawtsei a, October 16 thleng hun a pek chungchanga Court thutlukna sut tura ngenna thlen chu a hnawl.

Nikum August thla khan Supreme Court chuan Manipur sorkar hnenah panchayat inthlan chu thla ruk chhunga buatsaih turin a lo hriattir tawh a ni. Mahse, May 19 khan High Court chuan hun bituk hi pawtseiin, October 16 thleng hun a pe leh a ni. Hei vang hian tualchhung inthlan dan tur chungchanga Manipur High Court thutlukna siam chu Supreme Court thupek tihchhuah tawh zawm lohna niin an khing let a ni. Mahse, justice J.B. Pardiwala leh justice Manoj Misra-te ṭhutna Supreme Court bench chuan Manipur High Court thupek tihchhuah chu sawiselna tur a awm loh thu leh, inrawlh an tum loh thu an sawi. Inthlan buatsaih nan thla hnih dang hun pek belh a nih chhan chu state chhunga tualchhung dinhmun leh buaina hrang hrang vang a ni tih hriatthiampui a ṭul hle tih an tarlang.

State sorkarin tualchhung dinhmun thlirin, 2025 August thlaa Supreme Court thupek anga thla ruk chhunga inthlan buatsaih chu a la theih lo tih sawi a, ennawn tura a ngen hnuah High Court hian hun bituk hi a pawtsei a ni.