Manipur : TDC-in NH-37 project chungchang NHIDCL chhui an phut

Manipur-a Transporters’ and Drivers’ Council (TDC) chuan Union Ministry of Road Transport and Highways (MoRTH) chu National Highways and Infrastructure Development Corporation Limited (NHIDCL) in National Highway-37 project a thawh mek chu a rang lama chhuizuina nei turin an phut a, project thawh mekah thil fel lo a awm thu leh, tihkhawtlai a ni thu an tarlang.

Ministry of Road Transport and Highways Secretary hnena memorandum an theh luhah, council chuan Imphal-Jiribam highway dinhmun a ṭhat loh thu leh, hmun tam tak chu fur laiin lirthei tlan nan a hman tlak loh tih an tarlang. TDC chuan kum eng emaw zat chhung project thawh a nih tawh bakah, fund ṭhahnem tak sanction a nih hnuah pawh highway-a section hrang hrangah hmasawnna a awm lo tih an sawi.

Council chuan project thawh mekte endik a nih ngai loh avangin hmun hrang hrangah ruahsur avangin leimin a thlen nasat thu leh, lirthei tangkhang a tam hle ṭhin a ni, an ti. Hei bakah NHIDCL chuan project ṭhenkhat chu contractor hrang hrang kutah an hlan chhawng tih sawiin, hei hian hnathawh kawngah harsatna a thlen tih an sawi bawk.

Public fund hman danah thil fel lo a awm nia sawiin, council chuan independent high-level committee-in a hun taka endikna nei turin an ngen a, hnathawh tawhah technical leh financial audit neih an phut bawk a ni. TDC chuan Ministry chu official emaw contractor emaw thil tichingpen an awm a nih chuan man chhuak a, hremna pe turin an phut a ni.