Tripura : Agartala rel station-ah khuh damdawi Rs vbc 2.5 hu man

Tripura police leh Government Railway Police (GRP) ṭangkawp chuan July 2 Ningani zan khan Agartala Railway Station-a Deoghar Express aṭangin parcel van-ah khuh damdawi khap, Rs vbc 2.5 man hu an man.

An thudawn bawhzuia chhuizuina an neihah, official-te chuan parcel van uluk taka endikna an neihnaah Eskuf leh Fairdyl khuh damdawi bottle 39,345 an man a ni. Heng an thil mante hi metal drum 81 chhungah an lo thukru a ni.

He beihpui thlakna hi Government Railway Police (GRP), Anti-Narcotics Task Force (ANTF) leh Tripura police-a Special Branch-ten an kalpui a ni. Thuthar lakhawmtute a kawmnaah, special branch inspector general, Krishnendu Chakravertty chuan he beihpui thlakna hi ruihhlo do kawnga campaign kalpui chhunzawmna a nih thu a sawi. Tun hnai khan West Tripura district-a Jirania rel station-ah ruihhlo ṭhahnem tak man a lo ni tawh tih a sawi bawk. Ruihhlo tam tham lo pawh rel network hmanga tawlhruk a hluar thu leh, ruihhlo tawlhruknaa inhnamhnawihte pawh man zel an ni tih a sawi bawk.