Assam: July 6 aṭangin assembly budget session nei dawn

Assam Legislative Assembly budget session chu July 6 aṭangin ṭan a ni dawn a, July 31 thleng neih tur niin ṭhut khawm vawi 16 neih tura ruahman a ni. Chief minister Himanta Biswa Sarma kaihhruai sorkar term hnihna hnuaia full budget hmasa ber chu July 10 hian pharh a ni ang.

Finance minister Jayanta Malla Baruah chuan July 10 financial year 2026-27 a budget estimate awmna, Annual Financial Statement a pharh dawn a ni. Kumin Assembly inthlana National Democratic Alliance (NDA) in sorkarna a chan leh hnua budget a pharhna hma ber tur a ni. July 13-15 chhungin budget sawi ho a ni ang a, July 16-21 chhungin Departmentally Related Standing Committee (DRSC) meeting hrang hrang awm dawn vangin House ṭhutkhawm hi chawlh a ni ang. July 22 leh 23 ah demands on grant chungchang sawi ho leh vote lak a ni dawna ni. July 24 leh 31 chu Private Member's Business atan ruahman a ni bawk.

NDA sorkar term hnihnaah hian BJP chuan seat 82 lain, seat 126 awmna Assam Assembly-a party mala majority an neihna hmasa ber a ni. An thawhpui Asom Gana Parishad (AGP) leh Bodoland People's Front (BFP) chuan seat 10 ve ve an nei bawk. Eptu party lian ber, Congress party chuan seat 19 neiin, Raijor Dal leh AIUDF in seat 2 ve ve leh Trinamool Congress in seat khat an nei ve.

Kumin kumtir lam, Assembly inthlan neih hma khan financial minister, Ajanta Neog chuan February 17-ah vote-on-account budget a lo pharh tawh a, budget kimchang pharh a nih hmain sorkar sum hman dan tur phuhrukna atan interim outlay Rs vbc 62,294.78 ruahman a ni.