Sikkim leh Bengal CM-te an inkawm

Sikkim chief minister Prem Singh Tamang leh West Bengal chief minister Suvendu Adhikari-te chu Ningani khan Kolkata-a Nabanna-State Secretariat-ah an inbia a, state pahnihte inkalpawhna, healthcare leh public welfare tihchangtlunna atana thawh dun dan turte an sawi. Tamang chuan Bengal CM thar, Adhikari chu lawmpuina a hlan nghal a ni.

State pahnih CM te hian Siliguri-a SNT Complex-a Suswastha Bhawan Sikkim dinna tur pawh an pawm nghal a ni. He facility hi Sikkim aṭanga Siliguri-a damlo in entir tura kalte leh anmahni hruaitute awmna tura ruahman a ni. West Bengal CM chuan project hi rang taka thawh a nih theihna phalna pek ngaite pawh tihfel thuai turin a kaihhnawih department-te a hriatir nghal bawk.

West Bengal sorkar chuan Sikkim registered taxi, West Bengal-a service phalsak zat pawh 3,000 aṭangin 6,000 ah tihpun a remti bawk. Hei hi Sikkim leh Siliguri inkara taxi tlan ṭhinten an chhawr ṭangkai thei dawn a ni.

CM pahnihte hian kum 2023-a vûr tui lianin a nghawng chungchang an sawi dun bawk. He tui lian hian Teesta lui mawngah chirh leh vut tam tak a tlin tir a, hei hian National Highway-10 nasa takin a tichhia a, state inkalpawhna pawh a tibuai hle a ni. Sorkar pahnihte chuan he harsatna hi chinfel a nih theih nan Teesta lui mawng laih thuk leh sciene thiamna hmanga chirh leh vut enkawl hna chu thawh dun an remti. Tamang leh Adhikari-te chuan state pahnihte hmasawnna leh an hlawkpui tawn tur thil hrang hrangah thawh dunna ṭha zawk neih chhunzawm zel an tum thu an sawi.