PM Modi-a'n Manipur-ah project lian pariat a hawng In kawngka bulah Delhi a awm - PM

Prime Minister Narendra Modi chuan kar kalta Zirtawpni khan Manipur-ah project lian tak tak pariat a hawng a, project pali atan lungphum a phum nghel bawk.

Prime Minister Modi-a'n project a hawnte hi cheng vaibelchhe 1,500 senna tur a ni a, heng zingah hian India leh Myanmar inrina Moreh khuaa Integrated Check Post (ICP) pawh a tel a ni. Hei hi in-sumdawn tawn­na tihmasawnna tura ruahman a ni.

Vantlang inkhawma thu a sawinaah Narendra Modi chuan ICP chu check post mai a nih loh thu sawiin, thildang tam tak - customs formality, visa chungchang leh insumdawn tawnna lamah hmasawnna nasa tak thlentu tur a nih thu a sawi.

Project dang a hawn te chu Imphal East district-a Sawom­bung-a food storage go-down-te, Ukhrul district-a buffer water reservoir-te, Churachandpur district-a water supply project up-grade-na tur-te, Kangpokpi district-a eco-tourism complex-te, Noney district-a integrated tourist destination leh Ukhrul district-a water supply scheme-te an ni.

Modi chuan sorkar hmasa khan Manipur mai bakah hmarchhak state te an ngaihsak lo hle nia sawiin, "Tunah erawh in kawngka bulah Delhi a awm tawh a ni" a ti. Amah ngei pawhin hmarchhak chu vawi 30 dawn a tlawh tawh niin a sawi bawk.

Prime Minister hian imphal-a Dhanamanjuri University tih­changtlunna tur lungphum a phum nghal bawk a, Imphal West district-a Langjing Achouba-ah astro-turf football field tur lungphum a phum bawk a ni.

PM Modi chuan sorkar hmasa chu pawikhawihna ngaihthahah a puh bawk a, state hmasawnna tur project hrang hrang an tihkhawtlai nasa hle niin a sawi.

Chief ministers N Biren Singh kaihhruai BJP sorkar chu fakin an hmalakna ‘Go to Hills’ leh ‘Go to Villages’ te chu thil ṭha tak a nih thu a sawi. He an hmalakna hmang hian hmun kilkhawr zawka awmte leh sorkar chu an inhnaih sawt hle nia sawiin, Imphal aiport zauh a nih bakah hmeichhe bazar hawn a nih thu te pawh a sawichhuak bawk.

Hetihlai hian Prime Minister in a tlawh duh lo hian hel pawl ṭhen­khatin total shutdown an huaihawt avangin hmun ṭhenkhatah chuan nunphung a khaihlak a ni. 

PM Modi-a'n Manipur a tlawh avang hian state chhung hmun hrang hrangah venhimna khauh taka kalpui a ni.