Citizenship (Amendment) Bill dodalna a nasa CM Sonowal-a'n mipuite inbengdai turin a ngen

Citizenship (Amendment) Bill, 2016 dodalna chu a nasa zel a, Inrinni khan Assam hmun hrang hrangah duh lohna lantir leh a ni.

Lower Assam leh Dibrugarh-ah te chuan Prime Minister Narendra Modi lem siamchawp te chu hal a ni a, Chief Minister Sarbanada Sonowal chuan mipuite duhdan chu kalpui a ni ang tiin sawi mah se mipuite thirim chuan ziaawm lam a pan phah chuang lo a ni.

Zirtawpni liamta khan Prime Minister Narendra Modi chuan a kaihhruai sorkarin Citizenship Bill chu an tihhlawhtlin thuai dawn thu a sawi a, hemi avang hian mipuite hian duh lohna hi an lantir a ni.

The Citizenship (Amendment) Bill, 2016 hi Citizenship Act, 1955 siam ṭhatna tura tih niin pawm a nih chuan minority community - Hindu, Sikh, Buddhist, Jain, Parsi leh Kristian- Afghanistan, Bangladesh leh Pakistan aṭanga India ram rawn lut, kum ruk awm tling tawhte chu khua leh tuiah chhiar an ni thei dawn a ni. Heihi ram leilung fate chuan duh loin an hnam chimralna tur niin an ngai thung.

Prime Minister Modi chuan Zirtawpni khan BJP Lok Sabha poll campaign hmarchhaka a tlangzarh hnuah bill hi tu tan mah hlawkna a nih dawn loh thu leh tihhlawhtlin vat a nih dawn thu a sawi a ni. 

Hemi duh lo hian pawl 70 chuang chuan, Krishak Mukti Sang­ram Samiti (KMSS)-te kaih­hruaina hnuaiah Guwahati-ah Inrinni zing khan kawng an zawh.

Kawngzawhte hian Asom Gana Parishad (AGP) headquarter-a BJP office thleng kawngzawh an tum a, mahse police-te chuan an lo dang niin an hruaitu Akhil Gogoi Gogoi chuan a sawi. 

Hetihlai hian Assam Chief Minister Sarbanada Sonowal chuan Inrinni khan mipuite chu inbengdai tura ngenin, state sorkar chuan mipuite duhdan kalhin hma a la dawn lo niin a sawi.

Assam Chief Minister a nih angin Brahmaputra leh Barak Valley mipuite duhna humhalh chu a tihtur a nih thu a sawi a, ram leilung fate humhalna tur chuan a theihtawp a chhuah dawn tih a sawi a ni.