Assam Accord : HLC kaihruaitu tur Bezbaruah

Assam Accord 1985 Clause 6 kalpuina tura sorkar laipuiin a din, member pakua awmna high-level committee kaihruaitu tur chu bureaucrat hlui M.P. Bezbaruah a nih thu tarlan a ni.

Assam Accord Clause 6 hmang hian sorkar laipui chuan Assam ram leilung fate hnenah an cultural, social, linguistic identity leh heritage humhalhna tur constitutional, legislative leh administrative thlengin thuneihna a pe dawn a ni.

HLC din tur hian Union cabi­net chuan January 2 khan Prime Minister Narendra Modi kaihhruaina hnuaiah din an remti a, Committee hi thla ruk chhunga report thehlut nghal tura hriattir an ni bawk.

Bezbaruah hi 1964 batch IAS Officer a ni a, North Eastern Council member pawh a lo ni tawh bawk. Arunachal Pradesh ṭhalai Nido Tani, 2014-a Delhi-a thah anih chungchanga hma la tura din, Bezbaruah Committee pawh a lo kaihruai tawh a, Assam leh Mizoram-ahte pawh a awm tawh a ni. Prime Minister thi ta Atal Bihari Vajpayee hunlai khan Union Tourism Secretary a lo ni tawh bawk. UN World Tourism Organisation-ah pawh permanent honorary representative a ni bawk.

High level committee member zingah hian IAS officer retired Subhash Das-te, Assam Sahitya Sabha Nagen Saikia leh Sabha Rongbong Terang president hlui loi ni tawh-te,  The Sentinel newspaper founder-editor Dhiren Bezba-ruah-te, educationalist Mukunda Rajbangshi leh Assam Advocate General Ramesh Borpatragohain-te pawh an tel. 

Assam Accord hi August, 15, 1985-a ziah kha niin Clause 6-ah hian Assam leilung fate humhimna tur lam thu a inziak a ni.