Assam : District 30-ah weather alert tichhuak

Regional Meteorological Centre (RMC) chuan Assam-a district 30-ah sik leh sa inthlak danglam leh ruahsur bakah thlipui leh khawlum zual thleng thei a ni tih sawiin,yellow alert a tichhuak.

Weather office chuan district 16-ah khawlum leh uap nasa tak a thleng dawn tih an sawi bawk. RMC chuan ruah leh thlipui chu Morigaon, Sonitpur, Nagaon, West Karbi Anglong, Karbi Anglong, Biswanath, Golaghat, Jorhat, Dibrugarh leh Tinsukia district-ah te a thawk dawn tih an tarlang bawk.

Meteorological Centre chuan mipuite chu inralring tur leh, ruahsur leh thlipuiin nunphung a tihkhaihlak theih avangin pawn chhuah dawnah fimkhur turin an chah a ni.

India ram hmun hrang hrangah khawlum zual a thleng chho a, hmarchhak bialah pawh kum danga khawlum lam aiin 4-5 degree Censius in a sang. Assam state chhung hmun tam zawkah Inrinni liam ta khan khaw lum lam hi 35C chunglam an ni hlawm.