Meghalaya : CM-in West Jaiñtia Hills school building sakna tur lungphum phum

Meghalaya chief minister, Conrad K Sangma chuan July 3 khan West Jaiñtia Hills-a Sohkha Government Higher Secondary School sakna tur lungphum a phum a, state pumah sorkarin zirna infrastructure thuam chak turin hma a la chhunzawm zel tih a sawi.

Amlarem Block hnuaia Sohkha a tlawhnaah hian Chief Minister hi All Sohkha Development Committee-in zirlai tiṭhate chawimawina a buatsaihah a tel bawk. Hemi hnuah Sohkha Mission Village-a Children and Adolescent Library and Digital Infrastructure a hawng bawk a ni.

He huna thu a sawiah, Sangma chuan kum riat liam ta aṭanga sorkarin zirna sector tihmasawn tura hma a laknate a tarlang. State-a sikul 2,000 chuang tihchangtlung a ni tawh tih sawiin, sikul infrastructure leh zirtirtu training atan investment lian tham kalpui a ni bawk a, Secondary School Leaving Certificate (SSLC) pass percentage-ah pawh hmasawnna nasa tak a awm thu a sawi bawk.

Zirna lama harsatna la awm chungchangah CM Sangma chuan zirna system tihchakna turin sorkarin theihtawp a chhuah zel dawn tih a sawi. Sikul infrastructure thuam chak, Sohkha Government Higher Secondary School-a facility dah belh leh kawng inkalpawhna siamṭhat a, hmasawnna rualkhai taka kalpui a ni dawn tih mipui hnenah a sawi a ni.