Meghalaya : South Garo Hills-ah thla 8 chhung nu naupai thi report awm lo

Meghalaya-a South Garo Hills district-ah thla riat chhung, nikum October aṭanga kumin May thla thlengin nu naupai thi report an awm lo a, hei hi mipui hriselna lama hmasawnna lian tak a ni. State puma nu naupai thi zat 55% a tlakhniam laiin South Garo Hills district-ah hian 83% in a tlahniam tawh.

South Garo Hills district-ah hian healthcare infrastructure changtlung leh ṭha an nei lo a, hei bakah district hi tlang sanga awm a nih avangin tlawh pawh a harsa hle bawk. He district-ah hian Functional Referral Units (FRUs) an tlachham a, nu naupai leh nau nei hlimte enkawlna lamah an hnufual hle a, heti chungin hmasawnna chhinchhiahtlak tak an nei thei a ni.

District health thuneitute chuan infrastructure huang zauh aiin, inenkawlna an neih sate thawh hona ṭha hmangin an thuam chak a, nu naupai dinhmun ṭha lo enkawl kawngah theihtawpin hma an la a ni. Nu in nau an neih dawn hnaihah digital pregnancy tracking system hmangin enkawlna an pe a, health worker-te chuan nau nei turten a hun taka health facility an thlen theihna tur leh, uluk taka enkawl zui an nih theihna turin hma an la bawk.

Hei bakah Chief Minister’s Special Monitoring Scheme (CM-SMS) aṭanga advance fund chu Auxiliary Nurse Midwives (ANM)-te kutah dah a ni a, hei hian lirthei hman tur ruahmanna siamin, khawtlanga lirthei ruat bikte chu emergency transfer atana inpeih reng tura tih an ni. South Garo Hills-ah hian doctor specialist an neih loh avangin harsatna nasa tak an tawk fo ṭhin bawk. Hemi chungchangah hian district-a Maternal War Room Committee chuan Tura, Williamnagar leh Jengjal damdawi-ina specialist-te chu direct communication channel hmangin an be ṭhin a ni.