Arunachal : Emergency Helicopter tlangzarh

Arunachal Pradesh sorkar chuan Lower Siang district-a khaw hla leh tlawhpawh harsaa cheng, tuilian leh leiminin inkalpawhna a tihchhiat avanga harsatna tawk mekte tana ei tur supply leh helai district-a tangkhangte thiar chhuahna atan hman tur emergency helicopter a tlangzarh.

Skyone Airways Mi-172 helicopter chu Pasighat-Koyu a service tura tih a ni a, he aerial mission hian khaw chhungah ration supply a thawn dawn a ni. Helicopter hian metric ton 11.5 a rit buhfai bag 230 a thlen pui tawh a, buhfaite hi tuilian tuar chhungkuate hnenah sem a ni. Hei bakah inkalpawhna kawngte nasa taka a chhiat avangin, thuneitute chuan Sai leh ferry fuel service an kalpui bawk. Assistant commissioner Marngam Kakki Moyong chuan he service hi a hmunah a thlithlai a ni.

Helicopter hi hliam tuar phurhna atan hman a ni bawk a, damlo pali chu Koyu aṭangin Pasighat-ah enkawl tura hruai an ni tawh a; Daporijo, Koloriang leh Ziro aṭangin passenger 91 chhan chhuah an ni tawh bawk. Khaw hrang hranga ruahsur nasa avanga tuilian chuan kawng leh lei dawhte hmun tam takah a ti chhe bawk. He hmalakna hi Civil Aviation department chuan Disaster Management, Food and Civil Supplies, Health and Family Welfare leh Police department an thawhpuina hnuaia kalpui a ni.

State sorkar chuan tuilian leh leimin tuar chhawmdawl hna chu chief minister Pema Khandu leh, civil aviation minister Balo Raja-te kaihhruaina hnuaia neih a ni tih tarlangin, hna thawh chu Chief Secretary-in a thlithlai reng bawk. Hetih mek lai hian Akajan-Likabali-Bame kawnga Likabali-Basar-Bame chu siamṭhat hna thawh ṭan a ni tawh bawk.