Assam : Legislative Assembly-ah Hindi official language 4-na atan dah belh dawn

Assam Legislative Assembly chuan nimin, July 6 aṭanga Budget Session neihah House business kalpuina tur official language atan Hindi a dah belh. Hindi chu Assembly neih chhunga hman theih Assamese, English leh Bodo-te zingah a tel ve ta a ni. Assam Legislative Assembly neih chhunga hman turin Hindi hi official status pek a nih vawi khatna a ni.

He thutlukna hi assembly speaker Ranjeet Kumar Dass chuan puangin, rawtna hi Inrinnia General Purpose Committee-in meeting an neihah pawm a ni. Meeting-ah hian parliamentary affairs minister Pijusg Hazarika, minister Keshab Mahanta, opposition leader Wazed Ali Choudhury leh treasury leh opposition bench-a member-te an tel bawk. 16th Assam Legislative Assembly hi nimin July 6 aṭanga July 31 thleng neih tur a ni a, state budget chu July 10-ah pharh a ni ang.

Hei bakah speaker chuan Assembly television channel, ALA TV tih ni ṭhin chu Assam Bidhan Sabha TV tihah thlak a ni tih a sawi. Hemi chungchangah hian Dass chuan mipuiin legislative assembly an en theihna turin Lok Sabha TV leh Rajya Sabha TV line-a siam tum a ni tih a sawi bawk.