Assam: Finance Minister-in 2026-27 budget pharh
Assam Legislative Assembly budget session neih mekah, nimin khan finance minister Jayanta Malla Baruah chuan kum 2026-27 atana state budget, Rs vbc 2,85,084 a pharh. Baruah hian state budget a pharh ṭum khatna a ni.
Minister chuan budget tharah hian infrastructure tihhmasawnna turin Rs vbc 10,000 ruahman a nih thu a sawi a, heng zingah hian Rs vbc 4,954 senna tur Guwahati Ring Road Project a tel.
Welfare scheme hrang hrang tan Rs vbc 6,000 dah a ni a, sorkar chuan sorkar kal mekah hmeichhia 35,000 te hnenan hamṭhatna pek a tum. Divyang Vahan Scheme chu rualbanlo nuai 3.75 te huam tir tum a ni bawk.
Finance Minister chuan tea garden area-a cheng, nu naupaite chu Rs 15,000 zela ṭanpui tum a nih thu a sawi a, hemi rual hian graduate tawh, zirna sang zawk zir mek zirlai 48,366 te hnen thla tina puihna, Rs 2,500 pek ṭhin chu chhunzawm zel a ni ang, a ti. Lo neiha eizawnga te laka chhiah ngaihnathiamna siam, kum khata Rs nuai 2.5 la lut chin tih chu Rs nuai 10 chinah tihsan a ni.
Sorkar chuan Chief Minister's Agricultural Equipment Scheme pawh a kalpui zui zel dawn a, he scheme hnuaiah hian loneitu tenau leh rethei zawkte hnenah puihna, Rs 11,000 pek an ni.
Baruah chuan an state-ah medical college thar pali siam a ni leh dawn tih sawiin, hengte hi Goalpara, Hailakandi, Hojai leh Bajali ah siam a ni ang. Hengte nen hian Assam chuan medical college 28 a nei tawh dawn a ni. Hei hi state sorkar hmathlir, 'District tinah University, Medical College leh Engineering College' tih thupui a neih tihhlawtlinna tura hmalakna kawng khat a ni.
Finance Minister chuan sorkarin assembly tinah healtcare system thuam chak a tum tih sawi bawkin, khum 50 awmna First Referral Unit (FRU) dah vek a tum a ni, a ti. Hei bakah healthcare lama thawktu hrang hrang tan post thar siam tum a nih thu a sawi bawk.
State-in green energy siam chhuah kawngah theihna nasa tak a nei tih sawiin, energy ecosystem ngelnghet neih theihna turin hmalak a ni, a ti. Sorkar chuan Assam-a green energy siam tura theihna a neihte a hmuhpui tih sawiin, state chu power-surplus state leh hmarchhak biala Green Energy Hub-ah thlak danglam a ni dawn tih a sawi bawk.