Manipur : Meitei chenna in rauhsan paruk hal

Manipur-a Imphal West district-a Leimakhong Army Camp bul Kanto Sabal huam chhunga Meitei mi leh sate chenna in rauhsan takte chu Inrinni khan hal a ni a, he thil thleng vang hian buaina chhuak lehin, hnam leh hnam inkara buaina nasa zawk a chhuah lohna turin security-ten hma an la nghal bawk.

Official-te chuan he pawikhawihna hi zan dar 12:30 vela thleng a nih thu leh, Kangpokpi district aṭanga mipui pungkhawm chuan heng chenna in rauhsan takte hi an hal nia sawi a ni. Heng chenna inte hi kum 2023 May thlaa state-a hnam leh hnam inkara buaina a chhuah aṭanga chhuahsan tawhte an ni.

Kangmeiin structure a tihchhiat avanga Meitei khaw mipui lungawi lo chuan Kanto Sabal lam pana kawng zawh an tum a, sipai leh Central Armed Police Force (CAPF) te chuan buaina a chhuah lohna turin leh boruak tiziaawm turin hma an la nghal bawk a ni. Pungkhawm hnawh darhna turin security-te chuan tear gas shell an hmang bawk. Tualchhung mite chuan he thil thlengah hian mi pathumin hliam na vak lo an tuar tih an sawi. Security force-ten mipui inkara buaina lian tham chhuak thei chu hlawhtling takin an dang thei a ni.

Thuneitute chuan pawikhawihtu tu tih hriat lohte chuan chenna in rauhsan ṭhenkhat chu hal mah se, rang taka hmalak a nih avangin kangmei chu a darh hman lo niin an sawi bawk. Manipur police-te chuan thubuai ziah luh a nih thu leh chhuizuina neih nghal a ni tih thuchhuah an siam. Manipur police, Central Reserve Police Force (CRPF) leh Rapid Action Force (RAF) te chuan he thil thleng kaihhnawihah hian mi pahnih an man tawh bawk.