Nagaland : World Population Day hmang

Nagaland-a district hrang hranga Health department chuan Pathianni khan, "Healthy Timing and Spacing between Pregnancies for Well-being of Mother and Child and to Prevent Unintended Pregnancies" tih thupui hmangin World Population Day an hmang a, chhungkaw ruahmanna leh reproductive health awareness tihhmasawnna atan Population Week activity an kalpui bawk.

Dimapur-ah chuan Chief Medical Officer's Conference Hall-ah buatsaih a ni a, district-a health unit hnuaia medical officer-te an tel a ni. He huna resource perdon, chief medical officer Dr T Yetovi Tuccu chuan nu leh naupang hriselna tihhmasawn leh, a hun loa naupai venna atan naupai hun hriat a pawimawh thu a sawi. Duhthlanna hmangin nuin nau a pai tur a ni tih sawiin, nupa ṭhenkhatte chu an mamawh leh duhzawng a zira thutlukna dik tak an siam theihna turin family planning hrang hrangah counselling pek a ṭul thu a sawi.

Official-te chuan a thlawnin July 11 aṭanga 18 thleng hian mipa leh hmeichhe tan family planning service, awareness campaign leh sterilisation service kalpui a ni dawn tih an sawi bawk. Mokokchung-ah chuan CMO Conference Hall-ah programme hman a ni. He hunah hian district programme officer (UIP leh RCH) Dr Limanaro chuan World Population Day pawimawhzia leh chhungkaw ruahmannaa duhthlanna, naupai chungchanga hriselna leh nu leh naupang hriselna pawimawh nate a tarlang bawk. Population Week chhung block leh khaw hrang hrangah awareness campaign buatsaih a ni dawn tih a sawi bawk a ni.