Naga Peace Talk: Manipur-ah nawrh huaihawt chhunzawm zel

Sorkar laipui leh Naga helpawl, National Socialist Council of Naga­land - Isak Muivah (NSCN-IM) te inremna siamin Manipur state a nghawng tel duh lohna lantirin, Mani­pur-ah chuan nawrh huaihawt chhun­zawm zel a ni. Hei vang hian venhim hna thawk turin paramilitary force pawh thawn luh belh a ni tawh bawk. 

Manipur-a pawl hrang hrangte chuan nawrh huaihawtin, sorkar laipui chu Naga buaina an chinfel dan tur chuan Manipur ram chin a khawih tel dawn lo tih tiam turin an phut. Kar kal ta chhung khan nawrh huaihawt vang hian state chhung hmun hrang hrangah  nunphung a khaihlak phah hle a ni. 

Sorkar laipui leh NSCN-IM hian kar kal ta Ningani khan inbiakna an nei leh a, mahse inbiakna hi zawhfel a la ni lo tih sorkar chuan a sawi. Thutawp siam a nih hmain Assam, Manipur leh Arunachal Pradesh-a stakeholder hrang hrangte chu biakrawn leh phawt an ni dawn a ni, a ti. 

Manipur-ah nawrh huaihawt chhunzawm zel a nih avangin buaina lian tham a chhuah venthawn thilah, security force-te chu inralring turin hriattir an ni. Hmun hrang hrangah sipaite dah an ni bawk. Sorkar official chuan buaina chhuak tur vengin, paramilitary force company 15 chu duty tir an ni tih a sawi. 

Hetih lai hian pawl hrang pasa­rih intelkhawm, Coordinating Committee on Manipur Intergrity (COCOMI) chuan sorkar laipui chu intiam mah se, Naga helpawl nena an inbiak dan tak hi hriatchian a ni loh avangin mipuite lo bengdaih pawh chu thil harsa tak a ni, a ti. COCOMI coordinator Sunil Karam chuan, "An inbiaknaah eng tak nge an sawi tih mipuite hriattir a ni si lo. State sorkar leh sorkar laipui hnenah pawh framework agreement an ziah dan kimchang chu min hrilh turin kan ngen a ni," a ti. 

NSCN-IM hian Nagaland tan flag leh constitution hran neih an phut tel a, mahse sorkar laipui chuan constitution hran neih a remti lo. Flag hran erawh a neih a remti a, mahse hei pawh hi a hman theihna hmun bithliah sak an ni thung.