Tripura MLA-in Bru refugee buaina chinfel phut

Tripura-a Kanchanpur constituency, North Tripura MLA Prem Kumkar Reang chuan state sorkar leh sorkar laipui hnenah Bru refugee buaina neih mek chu chingfel tura phutin, an chingfel thuai lo a nih chuan MLA a nihna aṭanga a ban tur thu a sawi. 

Bru refugee camp-te hi Prem Kumar Reang-a bial chhungah hian an awm a ni. October 1 aṭang khan sorkar laipui chuan refugee camp-ah ration supply a titawp a, hei vang hian Bru raltlante hian sorkar lakah lungawi lohna an lantir a, ni li chhung chu Anandabazar-Dashda kawngpui an dang tawh a ni. Boruak a ṭhat loh vangin sorkar chuan Kanchanpur hmun ṭhenkhatah curfew a puan phah bawk. 

Prem Kumar Reang chuan MLA chauh a nih avangin tih theih a nei tlem tih a sawi. A hnampuite chu rilṭamin ei tur nei loin an awm mek a, heti chunga a ngawi reng a nih chuan atan thil zahthlak tak a ni dawn tih a sawi. Sorkar chu Bru raltlante harsatna tawh mek chu a rang thei ang bera chinfel sak tura a phut thu a sawi a ni.