President-in Meghalaya tlawh dawn

President Ram Nath Kovind chuan vawiin hian Meghalaya a tlawh dawn a, president a nih hnua a tlawh hmasakna ber tur a ni. 

President hian North Eastern Hill University (NEHU) convocation a hman­pui dawn a ni. Guwahati aṭangin Indian Air Force heli­copter hmangin Shillong a pan dawn a, Upper Shillong-a Eastern Air Command head­quarters Advanced Landing Ground-ah a ṭum ang. Govenor Tathagata Roy leh chief minister Conrad Sangma bakah mi pawimawh dangten an lo hmuak dawn a ni. 

NEHU Vice Chancellor Prof. S.K. Srivastava chuan President-in convocation a hmanpui thei tur chu lawmawm a tih thu a sawi. Kum 1973-a din, NEHU-ah hian Kovind hi Visitor a ni bawk. Convocation-ah hian zirlai 2,000 dawn hnenah degree pek a ni dawn. Gujarat mi, taksa lama rualban lo chunga social worker ṭha tak leh Disabled Welfare Trust of India dintu, Kanubhai Hasmukhbhai Tailor chu taksa lam rualban lo dinhmun chawikan sakna tura a hnathawh ṭhat avangin  Doctor of Letters (honoris causa) hlan a ni bawk ang. Tailor hian kum 2011 khan President hlui Pratibha Patil hnen aṭangin Padma Shri a lo dawng tawh a ni. 

President Kovind hian nimin khan Gangtok-a Sikkim University convo­cation vawi ngana a hmanpui bawk. Inrinni khan Gangtok hi a thleng a, Governor Ganga Prasad, chief minister Prem Singh Golay, Speaker of Sikkim Legislative Assembly, L B Das leh mi pawimawh dangten Libing-a Army Helipad-ah an lo hmuak a ni. President hian hemi ni vek hian East Sikkim-a Lingdum Monastery a tlawh nghal bawk.