Arunachal : Sorkar leh Norway Tidal Sail-in MoU ziak

Arunachal Pradesh sorkar chuan energy thianghlim leh ngelnghet tihhmasawn kawnga hma lakna turin, Norway-a Tidal Sail AS nen Memorandum of Understanding (MoU) an ziak. An thawh dunna hmang hian state-ah KW 500 River Kinetic Energy Demonstration Project kalpui a ni dawn.

He inremna hi state sorkar hnuaia Centre for Earth Sciences & Himalayan Studies (CES&HS) leh, Norway-a Tidal Sail AS-te chuan an ziak a ni. Project hi sorkar laipui hnuaia Ministry of New and Renewable Energy (MNRE) leh India-Norway Green Partnership thlawpna hnuaia thawh tur a ni. He hmalakna hmang hian India rama River Kinetic Energy Demonstration Plant hmasa ber chu Arunachal Pradesh-ah hian din tum a ni. He technology hian civil infrastructure lian tham mamawh loin lui luang aṭangin direct-in electric a siam chhuak dawn a, boruak tichhe thei lakah a ven dawn bakah, man tlawm zawkin renewable energy a pe chhuak thei dawn a ni.

Science and technology minister, Dasanglu Pul chuan MoU an ziah chu state-a clean energy siam chhuah kawnga hmalakna lian tak a ni tih sawiin, clean energy siam kawnga state inthlak danglamna tur leh, chenna leilung leh boruak tichhe loa energy thianghlim siam chhuah chawikanna a nih thu a sawi. He hmalakna thlawptu Ministry of New and Renewable Energy, Ministry of External Affairs, Royal Norwegian Embassy, Tidal Sail AS, Innovation Norway leh an thawhpui institution-te chungah lawmthu a sawi bawk.