Meghalaya : CM-in secretariat, unity mall leh sports complex tlawh

Meghalaya chief minister Conrad K. Sangma chuan nimin July 15, Nilaini khan New Shillong-a infrastructure project hrang hrang thawh mekte a tlawh a, project thawktu agency-te chu quality ṭha tak leh a hun taka zo fel turin a hriattir.

Chief Minister hian New Shillong Township-a hmasawnna project lian tham thawh mek zingah, New Secretariat Complex, Unity Mall, Umsawli-a Sports Complex leh project dang eng emaw zat a endik a ni. New Secretariat Complex chu a hun taka zawh fel a pawimawh thu sawiin, he complex hi sorkar department hrang hrang dahkhawmna hmun tur a ni a; thawh hona, inrelbawlna leh public service pek chhuah kawngah a pawimawh dawn hle a ni, a ti.

Unity Mall project pawh endikin, he hmun hi state-a kut themthiam, puantah tute, entrepreneur, self-help group-te leh tualchhunga thil siamtute tana buatsaih a ni. Project hian tualchhung enterprise a tihchak beisei a ni a, tourism a thuam chak dawn bakah state pumah khawsak a chawikang thei dawn a ni. Umsawli-a Sports Complex sak mek chungchangah, CM Sangma chuan world-class sports infrastructure din turin sorkarin nasa takin hma a la tih a sawi. New Shillong Township-a infrastructure hna thawh mek hrang hrang a endik bawk a, project thawktu agency-te chu thawh hona ṭha nei turin a chah bawk.