Assam : Tuilian vangin mi 4 thi tawh

Assam-a tun hnaia ruahsur nasa avanga tuilianah Thawhlehni thleng khan mi pali an thi tawh a, mi 37,000 chuangin harsatna an tawk mek tih Assam State Disaster Management Authority (ASDMA) chuan a tarlang. Tuilian vanga nunna chan report hnuhnung ber chu Sonitpur district-a thleng a ni a, Thawhṭanni zan aṭang khan a awmna chin hriat a ni lo a, a ruang hi Thawhlehni khan hmuh a ni.

Charaideo district-ah mi pakhat a thi a, Dhemaji district-ah mi pahnihin nunna an chan bawk. ASDMA chuan tuilian hian district paruk; Sonitpur, Dibrugarh, Lakhimpur, Dhemaji, Jorhat leh Sivasagar-te a nghawng tawh a, revenue circle 12 leh khaw 99-ah tuilian hi an tuar a ni. Mi 37,032 in harsatna an tawk mek a, Lakhimpur chu a tuar nasa ber niin mi 35,696-ten harsatna an tawk tawh a ni. Thawhṭanni khan district paruk aṭang hian mi 9,600 chuangin harsatna an tawk tih report a ni bawk.

ASDMA chuan relief distribution centre 20 aṭangin chhawmdawlna sem chhuah mek a ni tih tarlangin, Thawhṭanni khan State Disaster Response Force (SDRF) chuan Sonitpur district-ah mi 16 an chhan chhuak bawk. Tuilian hian lo neihna hmun ram hectare 1,103.94 a chim tawh a, ran vulh 16,139 a nghawng tawh bawk a ni. District hrang hrangah kawng leh infrastructure a tichhe bawk a ni.