Meghalaya: NEC-in Rs vbc 13.58 chuang sanction

North Eastern Council (NEC) chuan kumin May leh June thla chhung khan Meghalaya state-a hmasawnna hrang hrang thawhna tur Rs vbc 13.58 chuang a pe chhuak a; sum hi healthcare, zirna, renewable energy, hnam ziarang vawnhimna, inkalpawhna leh vantlang infrastructure thuam chakna atan hman a ni ang.

Hmalakna lian tham an neih zingah Tura Civil Hospital-a 1.5 Tesla MRI system dah a tel. He khawl hi Garo Hills leh a ṭhenawm hmun hrang hranga chengten an hmang ṭangkai thei dawn a ni. Council chuan Shillong Polytechnic-a infrastructure tihhmasawnna tur sum an sanction bawk a, technical education leh thil thar hmuh chhuah tihchakna atan, NERCORMS hnuaiah multidisciplinary training-cum-resource centre din a ni bawk dawn a ni.

Hei bakah hnam ziarang chawikanna atan Seng Khasi Cultural Complex leh, Seinraij Jowai Community Hall sak a ni bawk ang. Iewduh Market-a infrastructure tihchangtlun a ni bawk dawn a, hei hian sumdawng, loneitu leh consumer-te tan facility a tichangtlung dawn a ni. Council chuan Mawblei, Myntdu Leshka Stage-II leh Selim hydroelectric project-te tana survey leh investigation neihte chu a thlawp bawk a, hei hian state hma huna renewable energy hmasawn kawngah a pui dawn bawk.

Hemi hun chhung vek hian NEC chuan hmarchhak bial tihhmasawn hna thawhna pui turin regional institution hrang hrang; university, technical institute, NGO leh society-te hnenah Rs vbc 18.93 a sanction bawk. Council chuan kumin June thlaa NEC sum hmanga Shillong-Umroi Airport Road siam hna thawh zawh a nih thu a tarlang a; tourism, sumdawnna leh inkalpawhna tihhmasawn a nih rualin airport tihchangtlun kawnga hmalakna pawimawh tak a nih thu a sawi.