Manipur: IDP-ten DBT puihbawmna tihkhawtlai pek chhuah phut

Manipur-a Meitei internally displaced persons (IDPs) Apex Committee chuan sorkar chu IDP-te puihbawmna, Direct Benefit Transfer (DBT) kaltlanga pek chhuah tur tihkhawtlai chu pe chhuak turin an ngen a, hamṭhatna dawngtute chuan ṭanpuina hi ni 15 aia tam an dawng tawh lo niin an sawi.

July 16-a thuchhuah an siamah, committee chuan sum lama ṭanpuina pek chhuah tur tihkhawtlai a nih avangin chhungkaw tam takin harsatna an tawk mek tih an tarlang. DBT kaltlanga puihbawmna chu ei leh in, naupang zirna, hriselna leh nitin mamawh atan hman ṭhin a ni tih tarlangin, ṭanpuina pek chhuah tihkhawtlai a nih avang hian chhung tam tak chuan an nitin mamawh an lei thei lo tih an tarlang bawk.

Committee chuan thuneitute chu DBT hmanga ṭanpuina chu ni thum chhunga sem chhuak turin an ngen a, hei hian chhungkaw harsatna tawk mekte mamawh a phuhru thei dawn niin an sawi. Hei bakah sorkar chu thla leh aṭang chuan pawisa pek chhuah hun ruat bik ruahman turin an ngen a, hetianga kalpui a nih chuan IDP chhungkuaten sum an hman dan turah ruahmanna felfai an siam thei dawn a, harsatna an tawh ṭhinte a sukiang thei dawn a ni, an ti. Committee chuan a rang lama hma lak sak turin thuneitute an ngen a ni.