Sikkim : CM-in CM-SAATHI Initiative hawng

Sikkim chief minister Prem Singh Tamang chuan Ningani khan CM-SAATHI Initiative a tlangzarh a, he programme hi national-level entrance exam, JEE leh NEET-a inbuatsaih zirlaite a thlawna coaching leh zirna lama puihbawmna pekna tur a ni.

He hmalakna hi state sorkarin India sorkar-a SATHEE Initiative hnuaia IIT Kanpur a thawhpuinaa hawn a ni. Chief Minister chuan he programme hian video lecture, study material, mock test, practice question, doubt-solving support leh technology hmanga zirlaiten zirna ṭha an dawn theihna tura duan a nih thu a sawi. Programme chu state-a Lakshya Centre of Excellence-ah din a nih thu a sawi bawk.

He programme hi state puma sorkar leh mimal zirna in 40 chuanga zirlai 2,000 velin an chhawr ṭangkai thei dawn a, state chhunga Science leh Mathematics zirtirtute thuam chakna turin IIT Kanpur nen thawh hona ṭha neih a ni bawk ang.

CM Tamang chuan Ministry of Education leh IIT Kanpur chu national-level competitive examination zingah CUET, CLAT, NDA leh UPSC Foundation atan inbuatsaihte puihbawmna in ang tlang pe turin a ngen. Zirlaite chu he hmalakna hi hmang ṭangkai turin a ngen a; principal, zirtirtu leh nu leh pate chu an fate thlawp ṭha turin a chah bawk. Ministry of Education, sorkar laipui, IIT Kanpur, SATHEE team leh Education Department-te chungah lawmthu sawiin, he programme hmang hian zirna lama hmasawnna leh, state chhunga zirlaiten zirna ṭha an dawn theihna atan thlawpna pek zui zel tum a ni tih a sawi.