Tripura : Prisoner welfare leh victim compensation scheme hnuaiah Rs vbc 2.51 pe chhuak

Tripura sorkar chuan prisoner welfare hrang hrang leh, victim compensation scheme hnuaiah Rs vbc 2.51 a sem chhuak a, jail tichangtlung tura hma lak mek ani bawk tih Home (Prisons) secretary Brijesh Pandey chuan a sawi. He thu hi chief minister Manik Saha kaihhruaia Tripura Institution for Transformation (TIFT)-a Home (Prisons) department-in high-level review meeting an neihah puan a ni.

Support to Poor Prisoners Scheme hnuaiah state sorkar chuan, sum lama harsatna avanga bail bond pe thei lo lungin tang mekte ṭanpuina a pe a ni. Tun thlengin lung in tang 74-te chuan ṭanpuina Rs nuai 21.60 an dawng tawh a, hei vang hian bail-a chhuah theih an nih phah a ni. Pandey chuan Social Justice and Rehabilitation Scheme hnuaiah kum 2025-26 chhungin mi 37 hnenah zangnadawmna Rs nuai 101.65 pek a ni a, kum 2026-27 chhungin mi 15 hnenah Rs nuai 26.76 pek a nih thu a sawi bawk.

Tripura Victim Compensation Scheme hnuaiah hmeichhia, mipat hmeichhiatna lam hawia tihduhdahte leh, pawikhawihna dang vanga harsatna tawkte ṭanpuina Rs nuai 92.45 pek an ni tawh a, kum 2025-26 chhung khan hmeichhia 26 hnenah Rs nuai 9 pek a ni a, kum 2026-27 chhungin mi pahnih hnenah Rs nuai 9 pek a ni bawk. Union Home Ministry chuan kum 2021-22 chhung khan lung-in tihchangtlunna atan Rs vbc 3 a sanction a, hei hi video conferencing infrastructure siamna atan hman a ni. Kum 2025-26-a hman a atan Rs vbc 4.40 proposal thehluh a ni a, tun hnai khan sorkar laipui chuan lung-in tihchangtlunna tur Rs vbc 2 pek belhna tur a pawm bawk a ni.