Assam : Tulian vanga thi mi 21 awm belh

Assam-a ruahsur nasa avanga tuilian thlengah Thawhlehni khan mi 21 an thih belh leh a, district 16 aṭangin mi nuai 5.64 velin harsatna an tawk tawh tih Assam State Disaster Management Authority (ASDMA) chuan a tarlang. Tuilian vanga thite hi Sivasagar-ah mi 13, Charaideo-ah mi panga, Golaghat-ah mi pahnih leh Jorhat-ah mi pakhat an ni tih ASDMA chuan tarlangin, tuilian vanga thi zat hi mi 31 an tling tawh.

State chhunga tuilianin mi a nghawng zat hi nuai 3.63 aṭangin nuai 5.64 ah a pung tawh a, Sivasagar chu a tuar nasa ni chhunzawm zelin, mi nuai 3.59 in harsatna an tawk mek a, Jorhat-ah 87,662 leh Charaideo-ah mi nuai 72,646 ten harsatna nasa tak an tawk tawh a ni. Revenue circle 44 a khaw 872 chu tuilian hian a chim tawh a, relief camp 71-ah mi 12,284 an awm mek a, relief distribution centre 202 siam a ni tawh bawk.

Chief minister Himanta Biswa Sarma chuan nimin, July 22 khan tuilian vanga harsatna tawk mek, Charaideo district-a Sonari huam chhung a tlawh. CM hian tuilianin a chim khuate pawh endikin, relief camp-a awm mek chhungkuate a tlawh bakah chhan chhuah hna thawh dan leh chhawmdawlna kalpui dante district official-te nen an endik a ni. Rescue team-ten hmun hla leh tlawhpawh harsaa chhan chhuah hna thawh kawnga harsatna an neih an sawite pawh a ngaihthlak sak bawk.

Sarma chuan tuilianin chhiatna leh harsatna a thlen chu rin phak bak a nih thu thuthar lakhawmtute a hrilh. Mi tam tak relief camp-ah an awm mek a, ṭhenkhat chu tuilian vanga an la tangkhang thu leh, mi tam tak an thi tawh a, ruang pawh chhar belh zel a ni, a ti. National Disaster Response Force (NDRF), State Disaster Response Force (SDRF), sipai leh state sorkar ṭangkawp chuan chhan chhuah hna an thawk mek tih a sawi bawk a ni.