Nagaland : Mon district-a leimin tuarte tan Rs nuai 70 pe

Nagaland sorkar chuan July 19 leh 20-a Mon district-a leimin leh tuilian avanga harsatna tawk chhungkuate tan State Disaster Response Fund (SDRF) aṭangin Rs nuai 70 a pe chhuak. Deputy commissioner leh District Disaster Management Authority Mon chairma, Wennyei Konyak chuan pawisa chu thihna tawk chhungkuate leh hliam tuar bakah, leiminin chenna in a tihchhiat sakte hnenah hlan a ni dawn tih a sawi.

July 20-a chief minister Neiphiu Rio-a'n chhiatna thlenna hmun a tlawhnaah, civil society pawl, district damdawi-in leh tualchhung volunteer-te tan Rs nuai 10 a pek belh bawk. He chhiatna thlengah hian mi pakua an thi a, mi eng emaw zat an hliam bakah chenna in, kawng, lei dawh leh district hrang hranga vantlang infrastructure nasa takin a tichhia a ni.

Disaster Management Authority, district police, SDRF, 42 Assam Rifles, Territorial Army, line departments, village and ward council, Konyak Union, KNSK, KSU leh tualchhung volunteer-te chuan chhan chhuah hna an thawh chhunzawm zel a, chhawmdawlna sem chhuah leh service pawimawh pek chhuah kawngah hma an la bawk.

DC chuan fur ruahtui tlak tam laiin mipuite chu fimkhur turin a chah a, leimin hlauhthawnawmna bulhnaia awm lo tur leh tuilian bakah kawng dinhmun hlauhthawnawma kal lui lo turin a hriattir. Official-ten sik leh sa chungchanga thuchhuah an siamte ngaichang turin a chah.