Meghalaya : Shillong Airport tihzauh leh Aviation project pawmpui ngen

Meghalaya chief minister Conrad K. Sangma chuan Thawhlehni khan civil aviation union minister Kinjarapu Rammohan Naidu hmuin, state-a thlawhtheihna hmanga inkalpawhna thuam chakna tur aviation infrastructure project hrang hrang pawmpui turin a ngen.

Meeting-ah hian Chief Minister chuan Union Minister hnenah, state sorkarin project thawhna tura a tih tur ang zawng zawng a tihfel tawh thu leh, hna thawh thuai a nih theihna turin Ministry of Civil Aviation chu a rang lama pawmpui turin a ngen a ni. Umroi-a Shillong Airport tihzauh chu ngaih pawimawh ber a nih thu a sawi a, state sorkar chuan ram acre 22-a zau chu Airports Authority of India (AAI) kutah a hlan tawh tih a sawi bawk.

Runway zauh hunah chuan aircraft lian, Airbus A320 pawh Shillong Airport-ah hian a ṭum thei tawh dawn tih sawiin, khaw lian zawkah direct flight a awm theih phah dawn a, kawnga lirthei hmanga zin veivah a titlem dawn tih Sangma chuan a sawi bawk. Union Minister chu Shillong leh Tura-a heliport sak hna pawh thawh mek a ni tih hrilhin, RCS-UDAN scheme hnuaiah heliport dang pahnih siam belh a dil nghal bawk a ni.