District tinah hmasawnna inang tlang pek an ni dawn : Meghalaya CM

Meghalaya chief minister Conrad K. Sangma chuan sorkarin tualchhung mite ngaih pawimawh hmasak berte thlawpin, district tinah intluktlang taka hmasawnna hna thawh a ni dawn tih a sawi. CM Special Development Fund (CMSDF) chu state puma hmasawnna hna thawhna tur a nih thu a sawi bawk.

Nimina a chenna ina CMSDF sanction letter a sem chhuah hnua thu a sawiah, CM chuan hmasawnna programme liantham kalpuiin, mipui khawsak chawikanna tur a nih thu a sawi. CMSDF chu community hrang hranga hmasawnna hna thawhna atana hmanraw pawimawh ber a ni chhunzawm zel tih a sawi bawk. Hamṭhatna dawngtute leh project thawktu agency-te chu hna ṭha taka thawk tur leh, huntiam chhunga zo fel turin a chah. Sum lama ṭanpuina chu community institution, zirna in sak, sports organisation leh tualchhung pawl hrang hrangte tan a nih thu a sawi bawk a ni.

Project sanction zingah hian sikul building sak leh classroom dah belh, community leh multipurpose hall sak, office building, sikul leh vantlang institution-a inthiarna facility, basketball court, washing platform, tui in tur, ambulance service, infiamna hmanrua, zirna lama resource pawimawh leh vantlang infrastructure-te pawh an tel a ni.