Nagaland : DoNER-in project tihkhawtlai 12 titawp

Ministry of Development of North Eastern Region (MDoNER) chuan Nagaland-a project 12, hun rei tak chhung tihkhawtlai tawh Rs vbc 100.28 man hu chu a titawp. Kumin March thla thlenga official data-a a landanin, project 12 thawhna atan hian Rs vbc 100.28 sanction a ni a, heng zinga Rs vbc 60.30 chu scheme khar a nih hma khan hman ral a ni tawh a ni.

Project lian tham tihtawp tak zingah Kohima-a New High Court Complex Phase-I, Dimapur-a MW-23 HFO Thermal Power Plant leh Sanglao-a Noklak-Thonoknyu kawng siamte an tel. Endikna an neihah NESIDS-OTRI, NESIDS-Road leh NEC scheme hnuaia project 26 chu "distressed"-ah dah a nih thu a tarlang bawk. Heng zinga 16 hi Law & Justice, Public Works, Health leh School Education bakah department hrang hranga NESIDS-OTRI program hnuaia awm a ni a, project ṭhenkhat chu kum 2003 aṭang khan kalpui an ni tawh.

Nagaland hian MDoNER fund hnuaiah project 93 an thawk mek bawk a, hnathawh ṭan a nih aṭangin ministry chuan project 435 thawhna atan Rs vbc 5,337.93 a sanction tawh a ni. Tun hnaia MDoNER official, Principal Secretary leh development commissioner Y. Kikheto Sema-ten meeting an neihah, department hrang hrang chu rang zawka hnathawk tur leh, mumal taka endikna nei tura hriattir an ni.