Manipur : Supreme Court-in special court din rawt

Supreme Court chuan July 24 khan, Manipur-a kum 2023 May thla aṭanga hnam leh hnam inkara buaina chhuak kaihhnawiha thubuai chinfelna tur special court din a rawt. Hemi rual hian chhuizuina hna thawktu agency-te chu thubuai chinfel loha tihkhawtlaite a rang lama chingfel turin a hriattir a, a tuartuten chargesheet copy an dawn theihna atan hma la turin a chah bawk.

Chief justice of India Surya Kant leh justice Joymalya Bagchi leh V Mohana-te awmna bench chuan, tualchhung buaina kaihhnawih petition hearing neiin, Central Bureau of Investigation (CBI) leh Manipur Special Investigation Team (SIT)-te'n chargesheet an theh luh copy chu pawikhawihna tuartu eng emaw zat leh an chhungte hnenah pek an la ni lo tih an tarlang. Pawikhawihna tuartute aiawh, legal aid counsel-te chu Gauhati High Court leh Manipur High Court-a Chief Justice-te office-ah chargesheet copy la tura phalsak an ni a, CBI leh SIT-te chu kar khat chhunga document pe chhuak tura hriattir an ni.

Bench chuan Manipur sorkar, SIT leh CBI aiawha inlan, additional solicitor general Aishwarya Bhati chu thubuai chhuichian tawh kimchang leh chargesheet siam tawhte chipchiar taka theh lut turin a hriattir bawk a, thubuai chhuichian mek la chinfel loh chungchangte thehlut turin a ti bawk. Court chuan hetia data siam hian special court eng zat nge mamawh a nih dawn tih a hriat theih dawn niin an sawi. Hei bakah Manipur High Court chu tualchhung buaina a chhuah hnua rukbo nia report mi 30 te chungchang enfiah turin a hriattir bawk.