Meghalaya : Sorkar leh SBI-in MoU ziak

Meghalaya sorkar leh State Bank of India (SBI) chu Ningani khan State Government Salary Package (SGSP) tihchakna atan Memorandum of Understanding (MoU) an ziak a, banking service tihchangtlun leh sorkar hnathawkte tana sum lama hamṭhatna pekna tura duan a ni.

Inremna an ziah ṭhat hi kum 2012-a MoU an ziah tawh thlakna a ni a, insurance coverage tihchangtlun, concessional loan facility, digital banking service thuam chak, family banking benefit, leh value-added financial service dangte nena banking package tihhmasawnna tur a huam. He hamṭhatna hi SGSP account nei tawhte leh sorkar hnathawk tharte tan pawh pek a ni ang. MoU ziahnaa tel chief minister Conrad K. Sangma chuan sorkar hnathawkte hamṭhatna turin sorkarin hma a la chhunzawm zel tih sawiin, inremna hi state puma hmaih bik nei lo leh, digital banking tihhmasawn a nih ruala sorkar hnathawk service tihchangtlun tumna a nih thu a sawi bawk.

Official tarlan danin, kumin June 30 thleng khan SGSP hnuaiah sorkar hnathawk 43,000 chuangin SBI-ah hian account an nei a, hei hi state sorkar hnathawk 71% vel a ni. An zinga 33,000 chuangin bank-in loan facility hrang hrang a pekte chu an chhawr ṭangkai tawh. SGSP siam ṭhatah hian Rhodium salary package category siam a ni a, personal accident insurance coverage atan Rs vbc 1.60, air accident insurance atan Rs vbc 1.60, group term life insurance, mimal, chenna in, zirna leh lirthei loan-a processing fee tihhniam, RuPay, Visa leh Mastercard debit card tihchangtlun, YONO SBI leh digital banking service dang, free online fund transfer, leh SBI Rishtey hnuaiah family banking hamṭhatna pekna turte a tel.