Hmarchhak state zingah Manipur-ah Tharum thawhna a thleng tam ber

Union Home Ministry report-in a tarlan danin, kum 2018 chhung khan hmarchhak bialah Manipur state chu tharum thawhna thlen tamna ber a ni. Kum 2018 chhunga hmarchhak bial puma tharum thawhna thleng zinga 50% zet chu Manipur state chhunga thleng a ni. 

Kum 2018-a hmarchhak state hrang hranga tharum thawhna thleng zat ziahluh chu ṭum 252 a ni a, heng zinga 127 chu Manipur state bika thleng a ni. Hmarchhak state zingah kum 2018 chhungin Sikkim-ah tharum thawhna thleng report a awm lo thung.

Hmarchhak state zingah Manipur chu tharum thawhna thlen tamna ber ni mah se, kum 2017 aiin state chhunga tharum thawhna thleng hi 24% in a tlahniam thung. Tharum thawhna kaihhnawiha civil mi thihna thleng pawh kum 2017-ah 23 an awm laiin, 2018-ah chuan mi pariat an ni. 

Manipur-ah hian inlakhran duhtu leh helte laka beihpui thlaknaah, kum 2018 chhung khan hel 10 thah niin, 404 man an ni a, ralthuam chi hrang hrang 99 man a ni bawk. Home ministry report chuan kum 2013 aṭang khan hmar­chhak state hrang hrang security dinhmun pawh hma a sawn tih a tarlang. Hmarchhak bial pumah kum 2018 kha kum 1997 hnu lama helho pawikhawihna thleng leh helho kuta civil mi an thih tlem ber ṭum a ni. Hmarchhak puma helho pawikhawihna thleng vanga thi hi kum 2018-ah mi 37 awmin, heng zinga 23 chu civil mi an ni a, security force 14 an tel bawk. Kum 2017 khan mi 49 thi an awm. 

Kum 2018-ah hmarchhak bial pumah inlakhran duhte vanga pawikhawihna thleng a tlakhniam laiin Nagaland state bikah erawh chuan kum hmasa lam aiin a pung thung. Meghalaya-ah chuan helhote tharum thawhna thlen hi 48% in a tlahniam a, Arunachal Pra­desh-ah 40%, Assam-ah 16% leh Manipur-ah 24% in kum hma­sa lam aiin a tlahniam vek a ni.