UK-a Manipur sorkar dintute Bank account hreksak turin hriattir

Manipur sorkar chuan India lak aṭanga inlakhran duh a, London-a Manipur sorkar hran, Manipur State Council an din thu puangtu Yamben Biren leh Narengbam Samarjit chu an sum khawih chet theih loha hreksak turin bank hrang hrangte a hriattir. 

Kar kal ta Zirtawpni khan Special Secretary (Home) Kh Raghumani Singh chuan bank hrang hrang hnenah hriattirna hi a pe a ni. Singh chuan Biren leh Sa­marjit hian an account-a sumte hi thil ṭha leh danin a phal loh thil tihna atan an hmang thei a ni tih sawiin, hei vang hian an sum hi khawih chet theih loha hreksak an ngai tih a sawi a ni. 

London-a press conference an neihah, Biren hian Manipur State Council chief minister niin a inchhal a, Samarjit chu Manipur State Council-a exter­nal affairs and defence minister niin a insawi bawk. Tripura lal, Leshemba Sanajaoba remtihnaa din an nih thu an sawi a, mahse ani hian hei hi a hriatpui loh thu a sawi thung. 

Manipur chief minister N Biren Singh chuan Biren leh Samarjit-te hi state lakah indo puanga an ngaih thu sawiin, Imphal police station-ah thubuai ziahluh a ni tawh tih a sawi. An thiltih hi special crime branch-in chhui zuiin, a ṭul a nih chuan National Investigation Agency (NIA) kuta hlan a nih tur thu a lo sawi tawh a ni.