Meghalaya-ah Sustainable Mountain Development Summit nei

Meghalaya khawpui, Shillong-ah nimin aṭang khan Sustainable Mountain Development Summit vawi 8-na neih a ni a, November 6 thleng a awh ang. 

Summit hi chief minister Conrad Sangma-a'n a hawng a, ramchhung hmun hrang hrang aṭangin palai an tel. Kathmandu-based International Center for Integrated Mountain Development deputy director general Eklabya Sharma pawhin a telpui a ni.

Himalayan Region-a state hrang hrang minister, MP leh MLA te pawh he summit-ah hian an tel a, legislative conclave pawh buatsaih a ni dawn. Legislator meet hi Shillong MP Vincent Pala'n a ho dawn a, Tura MP Agatha Sangma chu convenor a ni. Meghalaya State Council of Climate Change and Sustainable Development chairperson Ferlin Sangma leh MLA HM Shangpliang te chu organising committee member an ni. 

Kumin summit-ah hian Himalayan Region huamchhunga chengte eizawnna leh ṭhalaite sumdawnna kawngte sawiho a ni ang.