Manipur : WCKCSO-in NH-202 block

Manipur-a Working Committee of Kuki Civil Society Organisations (WCKCSOs)-Ukhrul chuan National Highway-202 chu tiam chin awm loa block a nih thu puangin, Kuki-Zo chenna hmuna nitin mamawh supply a thlen ṭhat loh thu an sawi a, volunteer-ten civil mi an rubo nia puhna chu an hnawl bawk.

Thuchhuah an siamah, committee chuan Ukhrul leh Kangpokpi district-a Kuki-Zo civil society pawl hrang hrang nen inbiakna an neih hnuah kawng hi July 26 aṭang khan block a nih thu an sawi. An pawl chuan Kuki-Zo chenna hmunah nitin mamawh bungrua a ṭha lo nia sawiin, thuneitute chu hma la tawk loah an puh bawk a ni. Committee chuan sorkarin awmze nei taka hma a lak hma chuan kawng block chu chhunzawm zel a nih tur thu an sawi.

WCKCSO chuan lirthei damlo phur, passenger phur, khualzin airport pan turte leh security force-te chu endik an nih hnuah an kal tlang phalsak a ni dawn tih an sawi. Lungawi lohna lantirna atan hian sorkar leh mimal zirna in 14 chu khar lailawk a nih thu an sawi bawk. Committee chuan kawng block avanga harsatna thleng theite an hriatthiam rualin, lungawi lohna vawi tam tak an lantir hnuah pawh awmzia a awm loh avanga kalpui an nih thu an tarlang. Hei bakah an pawl chuan Overseas Bank-a thawk, Kharaingam Jaojo chu volunteer-te an rubo nia puhna an hnawl bawk.

Committee chuan an puhna chu thu belhchian dawl lo a nih thu leh, civil mi hren an nei lo tih an sawi. Mipuite chu thudik lo thehdarh kawnga fimkhur tur leh, thu belhchian dawl lo social media-a tarlan chuan buaina nasa zawk a thlen thei tih an sawi a ni.