Manipur : JTC-in emergency shutdown puang

Manipur-a Joint Tribe Council (JTC) working committee chuan Inpui, Liangmai, Rongmei leh Zeme community-te chenna hmun hrang hrangah emergency shutdown a puang a, May thlaa Naga civil mi paruk thah an nih chungchangah sorkarin hma a la lo niin an sawi.

Nimin July 29-a thuchhuah an siamah, JTC chuan kum May 13-ah Naga civil mi paruk leh pastor pahnih rukbo leh thah an nih thu sawiin, he pawikhawihnaa mawhphurtute chu thubuai siamsak an la ni lo tih an tarlang. An pawl chuan nimina Bitiang khuaa Naga Volunteer Group (NVG)-te beih an ni chu an dem thu an tarlang bawk. He inbeihnaah hian Cobra team leh ZUF-J member-te an tel niin a puh a, mahse he an puhna hi finfiah a la ni lo thung.

Pawikhawihna thleng ṭhin duh loh lantirna atan, JTC chuan Naga community pali kaltlanga National Highway, rel kawng project leh national infrastructure project dangte chu tihtawp lailawk nghal a nih thu an puang bawk. Mahse service pawimawh; medical facility, sikul leh college, PHED, electric leh telecommunication service-te chu shutdown hian a huam lo tih an sawi. JTC chuan sorkarin he inthahnaa mawhphurtute an man hma leh, Naga khuaa beihpui thlakna nia sawite an tihtawp a, a tuartute tana rorelna dik a awm hma chuan shutdown hi chhunzawm zel a nih tur thu an sawi.