Meghalaya : NPP-in FCRA Amendment Bill ngaihthah nia puhna an hnawl

Meghalaya-a rorellai, National People's Party (NPP) chuan Foreign Contribution (Regulation) Amendment Bill, 2026 siamṭhatna tura ruahmanna awmte an ngaihthah nia thuthar lakhawmtute report-in an puhna chu hnawlin, hemi chungchangah hian sorkar laipui hnenah an lungawi lohna an thlen fo thu an tarlang.

Nimin July 29-a thuchhuah an siamah, an party chuan puh an nihna chu thu belhchian dawl lo a nih thu leh, politics lama hamṭhatna tura eptu pawl aṭanga lo chhuak a nih thu an sawi. NPP chuan sakhua leh hnam tlem zawkte hamṭhatna humhalh kawngah sorkar laipui nen thawh hona ṭha an neih thu an sawi. State chief minister leh NPP national president Conrad K. Sangma kaihhruai palaite chuan tun thla khan union home minister Amit Shah hmuin, Section 16A(5) leh dan siam thar chungchanga an lungawi lohnate an thlen tih an sawi bawk.

Party chuan palaite zingah hian Presbyterian Church of India, North East India Christian Council (NEICC) leh Shillong Catholic Archdiocese bakah Garo Baptist Convention-te an tel tih an sawi. Sorkar laipui chu dan siamṭhat tum danah zirna, healthcare leh social welfare service-te tibuai lo turin an ngen. Amit Shah chuan palaite chu thutlukna siam a nih hmain stakeholder-te nena inrawnkhawmna zau zawk neih a nih tur thu a lo hrilh tih an sawi.