Arunachal : CM-in naupang hralh rukna do turin ngen

Arunachal Pradesh chief minister Pema Khandu chuan nimin, July 31 khan naupang hralh ruk, online hmanga invauna, ruihhlo hmansual, naupang inneihtirna leh ramri kaltlanga naupangte harsatna thlen thei do turin hmarchhak state zawng zawngten thawh hona ṭha leh nghet an neih a ṭul thu a sawi.

Tawang-a North East State Commissions for Protection of Child Rights (SCPCR) Convention hawnna session-a thu a sawiah, CM Khandu chuan naupang humhim kawnga harsatna tam tak chu state ramriah a hluar tih sawiin, hei vang hian thawh hona ṭha neih a pawimawh hle a ni, a ti. Convention chu hmarchhak biala State Commission for Protection of Child Rights-te tana platform hmasa ber a nih thu leh, naupang bo leh hralh ruk chungchanga thawh hona, naupang humhimna tihchak leh, online hmanga invauna thleng ṭhin tihtawpna tura hmalakna a nih a beisei thu a sawi bawk.

Arunachal Pradesh-a naupangte hamṭhatna tura hmalaknate tarlangin, CM chuan Dulari Kanya Scheme hnuaiah hmeichhe naupang 15,500 chuangin higher education atan sum lamah ṭanpuina an dawn tawh thu leh, Rs vbc 38 chuang sen a ni tawh tih a sawi. Beti Bachao, Beti Padhao campaign hnuaiah awareness programme 134 chuang neih a nih tawh thu leh, Girls Health & Hygiene Scheme hnuaiah kum 2026-27 chhung atan Rs vbc 3.3 ruahman a ni a, mi 25,000 chuang hnenah sanitary napkin pek an ni dawn tih a sawi bawk a ni.