Kum 2030-ah naupang inneihtirna tihtawp a ni dawn : NCW Chief

Ni thum chama Tripura tlawha zin, National Commission for Women (NCW) chairperson, Vijaya Kishore Rahatkar chuan Ningani khan sorkar laipuiin ramchhungah kum 2030-ah chuan naupang inneihtirna thleng ṭhin tihtawp a tum tih sawiin, kumin chhungin naupang inneihtirna report chu 10% a tihtlem tum a nih thu a sawi bawk.

Agartala khawpui thuthar lakhawmtute a kawmnaah, Rahatkar chuan Tripura-ah thla thum aṭanga thla li hnuah Sexual Harassment of Women at Workplace (Prevention, Prohibition and Redressal) Act, 2013 (POSH Act) hnuaiah local committee din a ni dawn tih a sawi. Rahatkar chuan commission hian naupang inneihtirna, mihring hralhrukna tihtawpna, cyber stalking leh hnathawhna hmuna hmeichhiate himna chungchangah programme buatsaih a nih thu a sawi.

POSH Act kalpui a nih chungchang sawilangin, Rahatkar chuan POSH Act chu ramchhung hmun hrang hranga kalpui a ṭul thu leh, he dan hi a taka kalpui a nih theihna atan leh he dan hnuaia ruahmanna siam angin internal leh local committee din a nih theihna atan state-ah workshop bautsaih a nih thu a sawi. Thla thum aṭanga thla li chhungin POSH kaihhnawih internal leh local committee din tum a ni, a ti. Chief minister Manik Saha nen an inhmuh thu leh, hmeichhiate hamṭhatna tur an sawidun thu a sawi bawk.