Manipur : Petroleum Transporters and Drivers Association-in nawrh huaihawt

Manipur Petroleum Transporters and Drivers Association chuan Imphal-Jiribam National Highway-37-a dan loa chhiah laksak ṭhin an nih avanga an lungawi lohna, sorkar hnena an thlen chu ngaihthah a nih chhunzawm zel avangin nimin July 31 aṭang khan 'Steering Wheel Down Stike' tih hmangin nawrh an huaihawt.

An pawl hian July 15 khan state sorkar hnenah memorandum theh lutin, an lungawi lohna leh harsatna an tawhte chinfel sak turin sorkar chu ni 15 chhung an pe a, July 29-a sorkar thuneitute nen meeting an neih hnuah pawh thutlukna mumal a awm loh avangin nawrh hi an huaihawt ta a ni. Nawrh huaihawt a nih chhung hian Imphal-a Malom Depot aṭangin petroleum product load emaw, retail outlet hnena supply emaw a ni dawn lo. Association chuan Sekmai Bottling Plant aṭangin gas agency-te hnenah LPG cylinder load leh supply a nih loh tur thu an puang bawk.

Association chuan petrol pump-te chu stock awmsa an hralh zawh hma chu hawn chhunzawm a nih tur thu leh, July 30 emaw a aia hmaa emawa supply an dawnte chu fuel outlet-ah hian hralh chhuah phal a ni. An pawl chuan nawrh huaihawt chu mipui tan harsatna a thlen theih avangin pawi an tih thu sawiin, mipui thlawpna an ngen a, national highway-a dan loa chhiah khawn ṭhin chuan mipui tam tak a nghawng niin an sawi. Harsatna an tawhte chinfel thuai a nih loh chuan state pumah petrol, diesel leh LPG supply-ah buaina a thlen thei dawn a ni.