Tripura : Governor-in ruihhlo do campaign thlawp turin mipui ngen

Tripura governor Indra Sena Reddy Nallu chuan state mipuite chu ruihhlo do campaign, 'Nasha Mukt Yuva Viksit Bharat Sankalp Abhiyan' thlawp turin a ngen a, he campaign hi sorkar hmalakna mai ni loin mipui hmalakna a nih thu a sawi. Pathianni khan ruihhlo dona campaign hi prime minister Narendra Modi-a'n virtual hmangin a hawng a ni.

Governor Nallu chuan Academic Building of Tripura University Conference Hall-a pungkhawm hmaa thu a sawiah, khawtlang mipuite chu ruihhlo do kawnga tel turin a ngen a, nu leh pate chu an fate ruihhlo hmansual hlauhawmzia zirtir tur leh, zirtirtute chu zirlaite hemi kawnga zirna peknaah mawhphurhna sang tak an neih thu leh an nunkawng kaihruai turin a chah. Khawtlang hruaitute chu entawn tlaka nung tur leh, ṭhalaite chu ruihhlo laka inthiarfihlim turin a chah bawk.

Sorkar laipui chuan kum 2014 aṭang khan PM Modi kaihhruainain ruihhlo do beihpui a thlak ṭan tawh tih a sawi. National Action Plan for Drug Demand Reduction (NAPDDR) chungchang sawilangin, Ministry of Social Justice and Empowerment chuan ruihhlo do kawngah hmalakna hrang hrang a kalpui thu leh, chung zingah chuan ruihhlo laka inthiarfihlim, vantlang inzirtirna, counselling leh ruihhlo hmangsual enkawlte pawh a tel tih a sawi.

Governor chuan kum 2020 August 15 aṭanga kalpui, Nasha Mukt Bharat Abhiyan (NMBA) chungchang sawilangin, district zinga ruihhlo hluarna 272-ah kalpui a nih thu leh, campaign chu ramchhunga district tinah kalpui a ni tawh a ni, a ti. He hmalakna hian thil tum pathum neiin, chung zingah chuan Narcotics Control Bureau hmanga ruihhlo supply tihtawp, Ministry of Social Justice and Empowerment kaltlanga awareness buatsaih leh Ministry of Health and Family Welfare hmanga ruihhlo vanga talbuai enkawlte pawh a tel a ni.