Arunachal : Tuilian tuarte ṭanpuina Rs vbc 44.55 pe dawn

Sorkar laipui chuan Arunachal Pradesh-a tuilian tuarte ṭanpuina turin State Disaster Response Fund (SDRF) hnuaiah state-a tuilian tuar chhawmdawl leh ṭanpuina atan Rs vbc 44.55 pek a remti. Chief minister Pathianni khan prime minister Narendra Modi leh union home minister Amit Shah-ten tuilian tuarte chhawmdawlna tur pek an remtih avangin lawmthu a sawi.

CM Khandu chuan ṭanpuina sum an dawn hmang hian, fur ruahtui tlak tam laia state chhung hmun eng emaw zata tuilian leh leimin avanga state sorkarin chhawmdawl leh chhan chhuah hna a kalpui mek chu a tichak dawn a ni, a ti. A hun taka chhawmdawl hna kalpui chuan tuilian leh leimin vanga harsatna tawkte ṭanpuina a tichak dawn tih a sawi bawk.

CM chuan state mipui aiawhin sorkar laipuiin puihbawmna a pek chhunzawm zel avangin lawmthu a sawi tih a tarlang. Infrastructure chhia, lo neihna hmun leh thingtlang lama chenna in tuilian leh leiminin a tihchhiat thuam ṭhat dan tur endik tura Inter-Ministerial Central Team (IMCT) tirh an nih avangin lawmthu a sawi bawk a ni.

Arunachal Pradesh hian kar eng emaw zat chhung ruah nasa tak a sur tawh avangin harsatna an tawk a, district tam takah tuilian leh leimin a thleng nasa hle bawk. Chhan chhuah leh chhawmdawl hna chu state thuneitute leh central agency-ten an thawk a, an zingah National Disaster Response Force (NDRF) pawh an tel.