Sikkim: Kum 6 hnuah Nathu La Pass hawng

Sikkim-a Nathu La Pass chu kum ruk khar a nih hnuah, India leh China insumdawn tawnna kalpui chhunzawmna turin hawn a ni leh ta. Ramria insumdawn tawnna hi India leh China ramri bul, No Man’s Land-ah Zirtawpni khan hawn a ni a, Sikkim sorkar leh China-a Tibet Autonomous Region official-te chuan insumdawn tawnna kawng hawn an puan hma hian thilpek an inpe a ni. Hemi hnu hian hawnna inkhawm chu Sherathang Trade Mart-ah neih a ni.

He huna thu a sawiah, Sikkim commerce and industries minister T.T. Bhutia chuan Nathu La Pass hawn a ni leh ta chu state tan hun chhinchhiah tlak tak a nih thu leh, tualchhung economy tihchakna bakah hnathawh tur kawng a hawng dawn a, ramria cheng mipuite khawsak a chawikang dawn a ni, a ti.

Bhutia chuan ramria insumdawn tawnna hawn a nihna chuan, tun hnaia Nathu La kaltlanga Kailash Mansarovar Yatra tuaitharna a tihlawhtling a, sorkar laipui Act East Policy, PM Gati Shakti leh Viksit Bharat hmalakna hnuaiah Sikkim chu hmun pawimawh a ni leh dawn tih a sawi. Nathu La Pass hawn a nihna chuan sumdawng inziaklutte chu Sikkim-a puantah leh kut hmanga thil siam chhuah bakah, organic lam hralh chhuah theihna hun remchang a pe tih a sawi. Minister chuan state sorkarin Director General of Foreign Trade (DGFT) nen inbiakna an neih thu sawiin, sumdawnna atana hman tur bungraw list huang zauh leh, ramri kaltlanga insumdawn tawnna tihpun tum a nih thu a sawi bawk.